شادي محمد في حواره لـ«الأسبوع»: الأهلي قادر على حصد إفريقيا.. ومستاء من انتقاد كولر

«بوابة الأسبوع» تواصلت مع نجم مصر والنادي الأهلي السابق، شادى محمد، وأجرت معه حوارا خاصا تحدث خلاله حول رأيه في أداء الاهلى أمام مازيمبى الكونغولي فى نصف نهائي بطولة دورى أبطال إفريقيا مباراة الذهاب.

ونستعرض ما دار في حوار كابتن شادى محمد على النحو التالي:

ما هو تقييمك لمباراة الأهلي ومازيمبي في الكونغو؟

الأهلى أدى مباراة كويسة جدا جدا وكان يقدر يحقق الفوز فى بعض من فترات المباراة، ونجح يرجع بنتيجة إيجابية مع فريق صعب يتغلب على أرضه ودائما بيطلع كسبان وبإذن الله الأهلي هيقدر يتخطى عقبة مازيمبى ويصعد لنهائي دوري أبطال إفريقيا.

هل كان لهزيمة الأهلي من الزمالك تأثير سلبي أم إيجابي على الفريق أمام مازيمبي الكونغولي؟

ليس لها أي تأثير سلبى أو إيجابي، الأهلي عنده خبرات كبيرة جدا جدا تساعده إنه يقدر يفصل كويس بين البطولات، هذا الجيل من اللاعبين فى آخر 4 أو 5 سنوات بيلعب نهائى إفريقيا كل عام بجانب وصوله الدائم لكأس العالم للأندية وتحقيق مراكز متقدمة كل ده دايما بيزود من خبرات الأهلي التراكمية واللى تساعده على تخطى أي تعثر.

صحيح أن مباراة الزمالك يكون ليها حسابات خاصة ومختلفة، وكانت مباراة رايحة جاية والأهلى الشوط الثانى وتحديدا آخر 20 دقيقة كان أفضل، ولكن ده كورة وكل شئ وارد فيها.. ولكن اللى أقدر أقوله ليك أن النادى الأهلى على مر العصور أول مباراة بيلعبها بعد أى خسارة بيكون هدفه الأساسي هو مصالحة الجمهور وهو ده اللى شوفناه من خلال أداء الفريق فى مباراة مازيمبي.

هل غياب محمد الشناوى وإمام عاشور وحسين الشحات وياسر ابراهيم وديانج أثروا على أداء النادي الأهلى أمام مازيمبي؟

طبعا لاعيبة كبيرة جدا وليهم تاريخ ومؤثرين ولكن محسناش بالفجوة الكبيرة لأن الرجل دايما بيعتمد على الروتيشن وفى لاعيبة مثلا مكانتش بتلعب خالص ولا بتدخل قائمة الـ18 ورجعت من بعيد وكانت مؤثرة جدا لما أخدت الفرصة مثل أحمد عبد القادر.

هل الأهلي قادر على تخطي عقبة مازيمبى الكونغولي؟

فى البداية لازم الأهلى يحترم الخصم علشان نسهل المباراة علينا لكن من الناحية الفنية والخططية وكل شئ الأهلى أفضل من مازيمبى وبأمر الله هيتخطى الفريق الكونغولى العنيد، وهيصعد النهائى وهيستفيد بعامل الأرض والجمهور ولكن بشرط زى مقولت احترام الخصم علشان منصعبش المباراة على أنفسنا.

ما هو تقييمك لأداء مصطفى شوبير مع الأهلى في الدورى وإفريقيا؟

مصطفى شوبير زيه زى أي لاعب فى الفريق مثل منعم هانى معلول ربيعة وغيرهم طبيعى جدا جدا يتألق، لأنه بيلعب في الأهلي مش الطبيعي ان اللى يلعب فى الأهلي يبقى موظف، لكن فعلا مصطفى ظهر بشكل كويس خلال الفترة الأخيرة، ولكن شرط الاستمرارية لأن النجومية استمرارية واللى يحب مصطفى لازم يحفزه أنه دايما يبقى أفضل أنه يبقى حارس منتخب مصر الأول فيما بعد.

لكن اللى مش بيحبه هو اللى يقعد يتكلم عنه ويقوله أنت أجمد حارس فى التاريخ وأنت اللى هتقعد الشناوى وغيره، ولازم يكون عندنا موضوعية فى تقييم اللاعبين من أجل الحفاظ عليهم.

ما رأيك فى أداء كولر مع الأهلي خلال الفترة الماضية؟

طبيعى يكون فى تذبذب ببعض الأوقات، وخاصة لما يغيب عنك 11 لاعب مرة واحدة لكن من غير الطبيعى بعد تذبذب مستوى أو هزيمة مباراة أو خسارة بطولة تطلع ناس تقول ده فاشل ولازم يمشى!!، احنا ده نقد غير موضوعى على الرغم أن الناس دي هى نفس الناس اللى طلعت من أيام قليلة تقول عليه كولر الاستثنائي اللي هيتخطى مانويل جوزيه!!!.

للأسف القاعدة الكتير على النت والسوشيال ميديا كل الناس بتتكلم فى كل حاجة وتنقد سواء سياسة أو رياضة أو فن أو أي حاجة تحس أن كل الناس بقت فاهمة فى كل حاجة!!! طيب يالى بتتكلم انت لو كولر مشى انت هتعرف تيجى تتدرب الفريق!!!! أه عايز تنتقد انتقد نقد فني خاص بمباراة، قول فى خطأ فى التشكيل خطأ فى تغيير إنما مش بالشكل ده.

وأخيرا مثلا أغلب الناس اللى بتقول أي كلام ومحسوبة علينا محللين كانوا بيقولوا كولر مش بيغير غير فى الدقيقة 70 أو 75 طيب مهو فى مباراة القمة غير 3 تبديلات بين الشوطين، يعنى معناها أن الراجل مش مرتبط بوقت الراجل بيغير لما يكون فى غلط فى التشكيل، وبيعدل وده يدل أنه مدرب فاهم وصاحى وبيقرأ المباريات كويس، وبعدين مهو ده كولر اللى السنة اللى فاتت أخد كل البطولات وعمل سنة استثنائية والموسم الحالى برده ماشى كويس جدا.

ما المراكز التي تحتاج تدعيم في الأهلي في الفترة المقبلة؟

مساك وظهير أيسر ولاعب خط وسط ومهاجم.

هل رحيل سيد عبد الحفيظ عن الأهلى أثر على أوضة اللبس؟

للأسف احنا مجتمع لا يؤمن بخلق كوادر جديدة، لازم نعمل مقارنات، أكيد سيد عبد الحفيظ كان ماشى كويس جدا جدا، لكن الإدارة شافت حان وقت التغيير، وأكيد هما أدرى، أما بالنسبة لخالد بيبو هو منصبه إداري مش هو اللى بينزل يلعب مش معقول كل حاجة يبقى هو السبب والكلام اللى بيتردد بتاع كولر محجمه وواخد جزء من صلاحياته الإدارية كلام حقيقى فعلا مينفعش يترد عليه، ليه كولر مثلا اللى هيروح يحجز الفندق أو الوجبات أو يكتب عقود اللاعبين أو غيره!.

في حال تخطى عقبة الأهلى لمازيمبي.. أيهما تفضل مواجهة الترجى التونسى أم صن داونز الجنوب إفريقي؟

نلاعب أي حد فيهم مش فارق، بإذن الله الأهلى يكسب أي حد، وبأمر الله الأهلى بطل إفريقيا للمرة 12 فى تاريخ القلعة الحمراء.